Çin hakimiyyəti ABŞ-dan idxal edilən bütün mallara 34% rüsum tətbiq etdiyini açıqlayıb.
Musavat.com xarici mediaya istinadla xəbər verir ki, bu addım aprelin 2-də 185 ölkə və əraziyə tariflər tətbiq edən ABŞ prezidenti Donald Trampın daha əvvəl elan etdiyi yeni ticarət tədbirlərinə cavab olaraq atılıb.
Pekin ən çox təsirlənən ölkələr sırasındadır, Çin iqtisadiyyatı son aylarda üçüncü dəfə ABŞ-nin ticarət məhdudiyyətlərini sərtləşdirməklə üzləşir. Yeni tədbirlərlə Çinin ABŞ-yə ixracına qoyulan tariflərin ümumi səviyyəsi indi 54%-ə çatır.
Beləliklə, Pekin Vaşinqtonun artan ticarət təzyiqinə cavab olaraq sərt mövqe nümayiş etdirir. Analitiklər hesab edirlər ki, bu cür hərəkətlər dünyanın iki ən böyük iqtisadiyyatı arasında gərginliyin yeni mərhələsinə gətirib çıxara və qlobal təchizat zəncirlərinə təsir göstərə bilər.
