“Real”ın braziliyalı ulduz hücumçusu Vinisius Junior 2 oyunluq cəza alıb və 600 avro məbləğində cərimə ödəməyə mükəlləf edilib.
Arena.az bu barədə İspaniya Kral Futbol Federasiyasının (RFEF) İntizam Komitəsinə istinadən məlumat verir.
Vinisiusun cəzalandırılmasının səbəbi braziliyalı futbolçunun İspaniya La Liqasının “Valensiya” ilə 12-ci turdan təxirə salınmış oyununda, “yarasalar”ın makedon qapıçısı Stole Dimitrievskiyə qarşı yolverilməz davranışı müqabilində birbaşa qırmızı vərəqə alaraq, meydandan qovulmasıdır.
Xatırladaq ki, “Vini” qırmızı vərəqə almamışdan əvvəl “Real”ın hücumlarından birindən sonra ot örtüyü üzərində oturmuş vəziyyətdə olub və bir anda rəqib qapıçı Stole Dimitrievski arxadan braziliyalı futbolçuya yaxınlaşıb və başına toxunub. Ehtimal ki, qapıçı oğruncasına “Vini”nin hörüklərindən dartıb-çəkə bilərdi. Buna cavab olaraq braziliyalı futbolçu qapıçını iki əli ilə üz nahiyəsindən itələyərək meydandan qovulub.
Vurğulanır ki, Vinisius 2 oyunluq cəza və 600 avro məbləğində cərimə ilə yanaşı, “Real”ı da ziyana salıb. Madrid klubu, ulduzunun davranışı müqabilində 700 avro məbləğində cərimə ödəməlidir.
Eyni zamanda Vinisius İspaniya Super Kubokunda “Malyorka”ya qarşı yarımfinal oyununda iştirak edə biləcək.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib.
Vinisiusun İspaniya nəhəngi ilə müqaviləsinin müddəti 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 22 oyuna çıxıb, 13 qol və 9 məhsuldar ötürmə ilə fərqlənib.
Vinisiusun “Real”da çıxışının ümumi mənzərəsi isə belədir: 287 oyun, 97 qol, 83 assist.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023), FIFA Qitələrarası Kubokun (2024) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 37 oyun keçirib, 5 qol vurub və 5 məhsuldar ötürmə verib. Vinisius Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” 24 yaşlı braziliyalı vingerin transfer dəyərini 200 milyon avro məbləğində qiymətləndirir.
