Britaniyalı aktyor Cud Lou Culiano da Empolinin “Kreml sehrbazı” əsəri əsasında çəkiləcək eyniadlı filmdə Rusiya Prezidenti Vladimir Putini canlandıracaq.
Yeniavaz.com xəbər verir ki, aktyor bu barədə “Deadline” portalına məlumat verib.
Lounun sözlərinə görə, o, hələ rol üzərində işləməyə başlamayıb.
“Bu, Everestə dırmaşmaq kimidir. Bu rol haqqında düşünəndə özümü indiyə qədər dağın ətəyində olan, indi isə başını qaldırıb zirvəyə baxan bir adam kimi hiss edirəm. Bəzən də fikirləşirəm ki, mən bunu necə edəcəyəm? Amma hər halda, mən bunun öhdəsindən gələcəyəm”, - deyə 52 yaşlı aktyor yeni rolu haqqında bildirib.
Filmə ekran həyatını fransız rejissor Olivye Assayas verəcək. Filmdə həmçinin Alisiya Vikander, Zak Qalifianakis və Tom Starric də çəkiləcək.
