Rusiyalı futbol mütəxəssisi Yuri Syomin gürcü hücumçu Xviça Kvaratsxeliyanın “Napoli”ni tərketmə ehtimalını şərh edib.
Arena.az Syominin bu barədə qənaətini təqdim edir:
“Fikrimcə, Xviça “Napoli”dən ayrılacaq. Digər çox vacib amil isə – puldur. “Napoli”də o, başqa klubun ona verə biləcəyi qədər pul qazanmayacaq.
Xviça artıq elə yüksək səviyyəyə çatıb ki, dünyanın istənilən komandasında çıxış edə bilər”, deyə Yuri Syomin vurğulayıb.
Xatırladaq ki, gürcü istedad Fransa nəhəngi PSJ-nin maraq dairəsindədir. Mümkün keçidin cari qış transfer pəncərəsində gerçəkləşəcəyi istisna edilmir. Futbolçu özü də PSJ-yə keçmək istəyir və digər klublardan gələn təklifləri nəzərə almır. Son xəbərlərə görə, Xviça ilə Fransa klubu arasında danışıqlar çox sürətlə keçib. Yekun razılıq bu həftə əldə oluna bilər.
Qeyd olunur ki, PSJ-nin baş məşqçisi Luis Enrike danışıqların düzgün getməsindən məmnundur, çünki Xviça ispan mütəxəssisin komandasında görmək arzusunda olduğu futbolçudur.
Xviça Kvaratsxeliya 2022-ci ilin iyul ayından “Napoli”də çıxış edir. Neapol təmsilçisi gürcü cinah hücumçusunu 13,3 milyon avro məbləğ müqabilində Batumi “Dinamo”sundan öz heyətinə qatıb. Xviçanın İtaliya klubu ilə müaviləsinin müddəti 2027-ci ilin iyun ayının sonuna qədər qüvvədədir.
Cari mövümdə “Kvara” “eşşəkciklər” üçün 17 oyun keçirib, 5 qol vurub və 3 məhsuldar ötürmə verib.
Kvaratsxeliyanın “Napoli”də çıxışının ümumi mənzərəsi isə 107 oyun, 30 qol və 29 məhsuldar ötürmədən ibarətdir.
“Kvara” “Napoli” ilə 2022/2023-cü illər mövsümü İtaliya A Seriyasının qalibi olub.
Xviça Kvaratsxeliya 2019-cu ilin iyununda debüt etdiyi Gürcüstan yığmasının heyətində 40 oyuna 17 qol vurub, 9 məhsuldar ötürmə verib.
Gürcü futbolçu klub karyerası ərzində “Dinamo” (Batumi), “Rubin” (Kazan), “Lokomotiv” (Moskva), “Rustavi” və “Dinamo” (Tiflis) komandalarında oynayıb.
“Transfermarkt” internet-portalı 23 yaşlı gürcü sol cinah hücumçusunun transfer dəyərini 85 milyon avro məbləğində qiymətləndirir.
Xatırladaq ki, Xviçanın atası Badri Kvaratsxeliya vaxtilə Azərbaycanın “Kəpəz” və “Şəmkir” komandalarında çıxış edib. Badri Kvaratsxeliya həm də Azərbaycan milli komandasının uğurları üçün çalışıb.
