Rusiyada ən böyük problemlərdən biri olan demoqrafik tənəzzül 2024-cü ildə daha da sürətlənib və ölkə əhalisi 500 min nəfər azalaraq təxminən 145 milyona düşüb.
Hafta.az-ın “Rosstat”a istinadən yazdığına görə, doğum nisbətləri 5 faiz azalarkən, ölüm nisbətlərində 2 faiz artım müşahidə edilib. Əhalinin azalması tendensiyası xüsusilə kənd yerlərində özünü daha qabarıq şəkildə göstərib. Mütəxəssislər bu vəziyyətin iqtisadi artımı və sosial quruluşu təhdid etdiyini bildirirlər.
Hökumət doğum səviyyəsini artırmaq üçün müxtəlif tədbirlər görməyə başlayıb. Doğuşa həvəsləndirmə tədbirləri, pulsuz uşağa qulluq xidmətləri və ailələr üçün genişləndirilmiş sosial yardımlar gündəmə gətirilib. Bundan əlavə, əmək miqrasiyası siyasətləri yenidən nəzərdən keçirilir və məqsəd ölkəyə daha çox əcnəbi işçi cəlb etməkdir. Bu tədbirlər həm iqtisadi dinamizmi, həm də demoqrafik sabitliyi təmin etmək məqsədi daşıyır.
Digər tərəfdən, prezident Vladimir Putin əhalinin azalmasının ölkənin ən ciddi problemlərindən biri olduğunu açıqlayıb. Rusiyada 2023-cü ildə cəmi 1 milyon 264 min körpənin doğulduğu bildirilsə də, gələcək illərdə doğum nisbətlərinin daha da azalacağı gözlənilir. Bu gün doğum səviyyəsi bir qadına 1,4 uşaqdır. Tarixən 20-ci əsrin əvvəllərində Çar Rusiyasında ildə 4-5 milyon körpə doğulduğu halda, indiki rəqəmlər son 100-200 ilin ən aşağı səviyyələrini göstərir.
Demoqrafik problemləri həll etmək üçün Putin hökumətə ailələrə bir sıra sosial dəstək verilməsi barədə göstəriş verib. “Qəhrəman Ana” adının hüquqlarının genişləndirilməsi, hamilə tələbələrə yardımın artırılması, uşaqlı ailələr üçün ipoteka güzəştləri, uşaqlara səyahət endirimləri kimi tədbirlər diqqəti cəlb edir. Bununla belə, Putin təkcə maddi dəstəyin kifayət etmədiyini və uşaq sahibi olmağın sosial uğurla əlaqəli olduğu yeni həyat anlayışının qəbul edilməli olduğunu vurğulayıb.
