Azərbaycan çempionu “Qarabağ” bu gün Avropa Liqasının 2024/2025 mövsümünün Liqa mərhələsində sonuncu – 8-ci oyununa çıxacaq.
Arena.az xəbər verir ki, Ağdam klubu səfərdə “Olimpiakos”la üz-üzə gələcək.
Yunanıstan təmsilçisi ilə qarşılaşma Pireydəki “Georgios Karaiskakis” stadionunda baş tutacaq. Qarşılaşmanı Rumıniyadan olan hakimlər briqadası idarə edəcək.
Azərbaycan çempionunun Avroliqanın Liqa mərhələsindəki çıxışı o qədər də uğurlu sayıla bilməz. Səfərdə “Tottenhem”ə (İngiltərə) 0:3, “Elfsborq”a (İsveç) 0:1 hesabıyla uduzmuş komandamız evdə də “Malmö”yə (İsveç) 1:2, “Ayaks”a (Niderland) 0:3, Lion “Olimpik”inə (Fransa) 1:4, “Styaua”ya 2:3 hesablarıyla məğlub olub. Qurban Qurbanovun kollektivi yalnız səfərdə “Bodo Qlimt”ə (Norveç) 2:1 hesabıyla qalib gəlib. Bu nəticələrdən sonra təmsilçimiz 3 xalla 34-cü pillədə qərarlaşıb.
“Olimpiakos” isə Avroliqanın Liqa mərhələsində keçirdiyi əvvəlki 7 oyunda 3 qələbə qazanıb, 3 heç-heçə edib və cəmi 1 məğlubiyyət görüb. Bu komanda hazırda 12 xalla 12-ci pillədədir.
Qeyd edək ki, “Olimpiakos” Ağdam klubu üçün tanış rəqibdir. Avroliqanın 2022/2023 mövsümündə də təmsilçimizə rəqib olan Yunanıstan klubu doğma meydanda 0:3 hesabıyla uduzmuş, Bakıda isə qolsuz heç-heçəyə nail olmuşdu. Bu üzdən yunanlar indi qisas almağa çalışacaqlar.
Bütövülkdə isə bu, Azərbaycan və Yunanıstan klublarının 15-ci avrokubok dueli olacaq. Əvvəlki 14 qarşılaşmada üstünlük Ellada təmsilçisindədir. 3 qələbəsi olan klublarımız 4 dəfə uduzublar. “Qarabağ” sabah qalib gələrsə, bu göstəricidə tarazlıq yaranacaq.
Əvvəlki görüşlərin düz yarısı – 7-si heç-heçə bitib. Top fərqi isə Azərbaycan klublarının xeyrinədir – 11-9.
Həm “Qarabağ”, həm “Olimpiakos” rəqib ölkə təmsilçiləri ilə 4 matç keçirib. Ağdam təmsilçisi yunanıstanlılarla 4 görüşdə qol buraxmayıb. Təmsilçimiz 3 qələbə qazanıb və yalnız bir dəfə heç-heçə edib. Ümid edək ki, uğurlu seriya bu oyunda da davam edər.
Avropa Liqası
Liqa mərhələsi, 8-ci tur
30 yanvar
“Olimpiakos” – “Qarabağ”
Hakimlər: Radu Petresku, Radu Qinquleaç, Mirça Mihail Qriqoriu, Marsel Birsan (hamısı Rumıniya).
VAR: Katalin Popa (Rumıniya)
AVAR: Sebastyan Koltesku (Rumıniya)
Hakim-inspektor: Gediminas Mazeyka (Litva).
UEFA nümayəndəsi: Mario Duran (Bosniya və Herseqovina).
Pirey. “Georgios Karaiskakis” stadionu. Saat 00:00.
