Ətraf mühitin qorunması və təbii ehtiyatlardan səmərəli istifadə edilməsi “Baku Steel Company” QSC-nin (BSC) fəaliyyətinin əsas istiqamətlərindən biridir. Davamlı olaraq ekoloji layihələrə dəstək verən şirkət Ekologiya və Təbii Sərvətlər Nazirliyi (ETSN) tərəfindən mükafata layiq görülüb.
ETSN-in 2024-cü ildə ekoloji məsələlərin həllinə öz töhfələrini verən təşkilatları mükafatlandırdığı tədbirdə BSC “Yaşıl gələcək” platforması ilə keçirilən ağacəkmə aksiyalarında ən yaxşı tərəfdaş» nominasiyasının qalibi olub. Mükafatı ekologiya və təbii sərvətlər naziri Muxtar Babayev təqdim edib.
Qeyd edək ki, BSC 2024-cü ildə, BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) tədbirləri çərçivəsində, Qaradağ rayonunun Müşfiqabad qəsəbəsində 2 ha ərazidə 1250 ədəd Azərbaycanın “Qırmızı Kitab”ına daxil olan Eldar şamı, eləcə də zeytun ağacı, Sumqayıt Kimya Sənaye Parkının ərazisində isə 500 ədəd şəmşir ağacı əkmişdi.
Şirkət əvvəlki illərdə də yaşıllıqların salınması ilə bərabər, digər ekoloji yönümlü layihələr həyata keçirib. Buna misal olaraq, 2024-cü ildə COP29 ərəfəsində BSC və “QGallery” bədii qalereyası birlikdə “Baku Steel Art 2024” adlı beynəlxalq metal simpoziumu təşkil edib. Simpoziumun keçirilməsində məqsəd incəsənət və metallurgiyanın ekoloji dəyişikliklər və davamlı inkişafın katalizatoru kimi çıxış edə biləcəyini nümayiş etdirmək idi. “Baku Steel Art 2024” simpoziumunun nəticəsi olaraq, 7 ölkədən (Azərbaycan, Gürcüstan, Türkiyə, Rumıniya, İsrail, Bolqarıstan, Hindistan) 12 rəssamın iştirakı ilə BSC-nin istehsal etdiyi məhsullarından və metal qırıntılarından hazırlanan incəsənət əsərlərinin sərgisi təşkil olunmuşdu.
