"Cənab Prezident İlham Əliyevin yerli televiziya kanallarına verdiyi geniş müsahibə Azərbaycanın keçən müddət ərzində qazandığı iqtisadi və siyasi uğurları əks etdirir".
Bu sözləri Milli Məclisin deputatı, Ana Vətən Partiyasının sədr müavini Günay Ağamalı "Cebheinfo.az"-a açıqlamasında deyib.
O bildirib ki, qlobal müstəvidə davam edən geopolitik rəqabət, Qərb və Şərq arasında münasibətlərdə yaşanan ziddiyyətlər dövlətlərin iqtisadi inkişafına öz mənfi təsirini göstərməkdədir:
"Xüsusilə, Rusiya-Ukrayna müharibəsinin davam etməsi və Yaxın Şərqdə baş verən hərbi-siyasi proseslər tədarük zəncirində ciddi axsamalara səbəb olmuşdur.
Təbii ki, Azərbaycan da dünyanın bir parçası olduğu üçün həmin mənfi təsirlər bizdən də yan keçmir.
Lakin dövlət rəhbərimiz İlham Əliyevin uzaqgörən və məqsədyönlü iqtisadi-siyasi islahatları nəticəsində ölkəmiz davamlı inkişaf yolu tutmuş, mənfi tendensiyalardan sığortalanmışdır.
Cənab Prezident İlham Əliyevin iqtisadi göstəricilərimizlə bağlı nikbin fikirləri onu deməyə əsas verir ki, qarşıya qoyulan bütün investisiya layihələri uğurla həyata keçirələcək və dinamik inkişaf meyilləri vətəndaşlarımızın sosial rifahının yüksəlməsinə xidmət edəcəkdir".
Deputat vurğulayıb ki, Ukraynanın Rusiya qazının Avropa bazarlarına çıxarılmasında tətbiq etdiyi maneə, “qoca qitə”nin enerji təhlükəsizliyində Azərbaycanın rolunu daha da artırır:
"Təsadüfi deyil ki, əksər dövlətlər, xüsusilə, Şərqi Avropa ölkələri Azərbaycan qazının nəqlini yeganə çıxış yolu kimi qəbul edir. Bununla yanaşı bərpa olunan enerji mənbələrinə diqqətin artırılması, işğaldan azad olunmuş ərazilərin enerji potensialının tətqiq edilməsi Azərbaycanın daha böyük perspektivlərdə inkişafını stimullaşdıracaq.
Bu istiqamətdə ölkənin müxtəlif bölgələrində ekoloji təmiz günəş enerjisinin istehsalı ilə əlaqədar həm yerli, həm də xarici investisiyaların cəlb edilməsi uğurlu iqtisadi diversifikasiyanı şərtləndirən başlıca amillər sırasında qərarlaşır".
