Yerli rəsmilər ölənlərin sayının arta biləcəyini bildirib və yanğınları mahalın tarixindəki ən dağıdıcı yanğın adlandırıblar...
Poliqon xəbər verir ki, bu barədə yerli hakimiyyət orqanlarının məlumatlarına istinadən CNN telekanalı məlumat yayıb. Los-Anceles Yanğınsöndürmə İdarəsinin rəisi Kristin Krouli yanğın nəticəsində demək olar ki, tamamilə məhv olmuş Palisades məhəlləsində daha iki nəfərin öldüyünü təsdiqləyib. Bundan əvvəl 6 nəfərin öldüyü bildirilirdi.
Los-Anceles dairəsinin yanğınsöndürmə xidmətinin rəhbəri Entoni Marron bildirib ki, böyük İton yanğını ən azı 4000 strukturu məhv edib və nəzarət altında deyil. Dairə adminstrasiyası müdiri Ketrin Barqer 20 nəfərin talançılıqda şübhəli bilinərək həbs edildiyini bildirib.
Xatırladaq ki, yanvarın 7-də meşə yanğınları Cənubi Kaliforniyaya yayılıb. Ştat yanğınsöndürmə idarəsinin məlumatına görə, Los-Anceles dairəsindəki yanğınlar 11 min hektar ərazini əhatə edib.
ABŞ prezidenti Co Bayden ştatda böyük fəlakət elan edib. Los-Ancelesdə 180 mindən çox insanın evlərini tərk etməsi tələb olunub. JPMorgan Chase zərəri təxminən 50 milyard dollar qiymətləndirib.
Poliqon.info
