ABŞ prezidenti Co Bayden seçilmiş dövlət başçısı Donald Trampın andiçmə mərasiminə beş gün qalmış yanvarın 15-də vida nitqi ilə ölkə xalqına müraciət edəcək.
Yeniavaz.com xəbər verir ki, bu barədə Ağ Evin rəsmi saytında məlumat verilib.
“Çərşənbə günü, yanvarın 15-də, saat 20:00-da (Bakı vaxtı ilə 16 yanvar, saat 5:00-da) prezident Oval kabinetdən xalqa vida nitqi söyləyəcək”, - məlumatda deyilir.
Qeyd edək ki, 82 yaşlı Co Bayden ABŞ-nin 46-cı prezidentidir. O, 20 yanvar 2021-ci ildən bu vəzifəni icra edir. Bayden 2009-2017-ci illərdə prezident Barak Obamanın vitse-prezidenti vəzifəsini icra edib. 1973-2009-cu illərdə isə ABŞ Senatında Delaver ştatını təmsil edib.