“Sevgi odası: Əli və Nino balı” - əfsanəvi sevgi hekayəsinə səyahət

Yanvarın 13-də Azərbaycan Milli İncəsənət Muzeyində yazıçı Qurban Səidin dünyaca məşhur "Əli və Nino" romanının əsasında "Sevgi odası: Əli və Nino balı" adlı immersiv tamaşa keçirilib. Unudulmaz sevgi hekayəsindən bəhs edən, İlqar Safatın rejissorluğu ilə hazırlanan bu unikal tamaşa Azərbaycan Dövlət Akademik Rus Dram Teatrının aktyorları tərəfindən təqdim olunub. Əli və Nino rollarında Murad İsmayılov və Səma Vəliyeva çıxış ediblər. Digər rollarda Azərbaycanın Əməkdar artistləri Maqsud Məmmədov, Salman Bayramov, Elmira Aslanova və Yelena Spitsına yer alıblar. Tamaşanın quruluşçu rəssamı Mustafa Mustafayev, xoreoqrafı Nigar Rzayevadır. Əsərin motivləri əsasında səhnələşdirmə isə Valentina Reznikovaya aiddir.

Bal öz iştirakçılarını sanki Şərq və Qərbin fərqli dəyərlərinin birləşdiyi mistik atmosferə səyahətə aparıb. Hər bir qonaq bu bənzərsiz gecənin bir hissəsinə çevrilərək özünü əbədi sevgi hekayəsinin qəhrəmanı kimi hiss edib. Qonaqların Əli və Nino dövrünün geyim dəbindən bəhrələnən Şərq zərifliyini və Avropa eleqantlığını əks etdirən kostyumlarda qatıldığı gecə muzeydə ecazkar ab-hava yaradıb. Hazırda teatrın səhnəsində oynanılan "Əli və Nino" tamaşasından kiçik səhnələrı və dövrün rəqslərini ifa ediblər. Azərbaycan Respublikası mədəniyyət nazirinin müavini Murad Hüseynov, nazirin müşaviri Cahangir Səlimxanov və digər tanınmış simaların qatıldığı İmmersiv tamaşanın sonunda Azərbaycan Milli İncəsənət Muzeyin direktoru Şirin Məlikova çıxış edərək aktyorlara və qonaqlara öz təşəkkürünü bildirib və belə gözəl sənət məkanında bu kimi maraqlı və unikal tədbirlərin davam edəcəyinə ümid etdiyini vurğulayıb. Azərbaycan Dövlət Akademik Rus Dram Teatrının direktoru Ədalət Hacıyev və tamaşanın rejissoru İlqar Safat isə öz çıxışlarında tədbirin təşkilatçılarına minnətdarlıqlarını ifadə edərək qonaqları teatrın tamaşalarına dəvət ediblər.

Əsrarəngiz hiss və duyğuların hökm sürdüyü gecənin iştirakçıları muzeydən unudulmaz təəssüratlarla ayrılıblar.

İnformasiya dəstəyi - Trend.Az, Day.Az, Milli.Az, Azernews.Az