Cənubi Koreya müstəntiqləri ölkə tarixində ilk dəfə olaraq vəzifəsindən uzaqlaşdırılan, lakin vəzifəsini icra edən prezidenti həbs ediblər.
Editor.az “Yonhap” xəbər agentliyinə istinadən bildirir ki, Yoon Seok-Yeol haqqında həbs qərarı yerli vaxtla saat 10:30-da icra edilib. Daha əvvəl siyasətçinin vəkili Seok Dong-hyun demişdi ki, fəaliyyəti dayandırılmış lider Korrupsiya İstintaq İdarəsinin (CIO) müstəntiqləri tərəfindən dindirilməyə gələcək, baxmayaraq ki, o, hələ də davam edən istintaqı və onu həbs etmək cəhdlərini qanunsuz hesab edir.
Bu səhər təxminən 200 polis məmuru və 40 CIO müstəntiqi Yoon Seok-Yeolun həbsinə dair orderi icra etmək üçün onun iqamətgahına gəlib, lakin onun təhlükəsizlik detalları ilə yenidən toqquşub. Bundan əvvəl onlar prezident kompleksinin ərazisində dövlət başçısının mühafizəsinin avtomobil və avtobusların düzüldüyü üç cərgə maneəni dəf ediblər. Təxminən iki saat yarımdan sonra nərdivanlardan istifadə edərək polis əməkdaşları və müstəntiqlər binaya daxil ola biliblər.
Qeyd edək ki, 2024-cü il dekabrın 14-də Cənubi Koreya parlamenti dekabrın 3-də ölkədə hərbi vəziyyət elan edən prezident Yoon Seok-Yeola impiçment elan edib. CIO onun həbsi üçün üsyan və vəzifə səlahiyyətlərindən sui-istifadə ittihamı ilə order verib, lakin yanvarın 3-də onun mühafizəçiləri siyasətçini saxlamağa mane olublar.
//Samir Qurbanov, Editor.az
