İtaliya A Seriyasının “Komo” ilə 19-cu tur səfər oyunun “Milan”ın fransız sol cinah müdafiəçisi Teo Ernandes üçün əlamətdar olub.
Arena.az məlumat verir ki, Ernandes “rossoneri”nin 2:1 hesablı əzmkar qələbəsinə vurduğu qolla töhfəsini verib.
Bu qol Ernandesin İtaliya A Seriyasında “Milan” üçün vurduğu ümumilikdə 30-cu qol olub. Beləliklə Ernandes İtaliya A Seriyasında “rossoneri”nin ən sərrast müdafiəçisinə çevrilib. Ernandes müvafiq göstəricidə “Milan”n əfsanəsi, italyan keçmiş müdafiəçisi Paolo Maldinini geridə qoyub.
Teo Ernandes futbola “Rayo Maxadahonda” klubunda qədəm qoyub və buradan Madrid “Atletiko”suna keçərək, böyük futbolda debüt edib. Ardınca Ernandes “Alaves”, “Real” və “Real Sosyedad”da oynayıb.
“Milan” Ernandesi 2019-cu ilin iyul ayında 22,80 milyon avro məbləğ müqabilində “Real”dan tamhüquqlu əsasda “rossoneri”nin düşərgəsinə qatıb. Fransalı futbolçunun İtaliya klubu ilə müqaviləsinin müddəti 2026-cı ilin iyun ayının sonuna qədər qüvvədədir.
Cari mövsümdə Ernandes “Milan” üçün bütün yarışlarda 24 oyuna 4 qol və 3 məhsuldar ötürmə ilə fərqlənib.
Ernandesin “Milan”ın heyətində çıxışının ümumi mənzərəsi 237 oyun, 33 qol, 42 məhsuldar ötürmədən ibarətdir.
Teo Ernandes 2021-ci ilin sentyabr ayında debüt etdiyi Fransa yığmasının heyətində 36 oyuna 2 qol və 9 məhsuldar ötürmə ilə fərqlənib.
“Transfermarkt” internet portalı 27 yaşlı fransız sol cinah müdafiəçisi Teo Ernandesin transfer dəyərini 50 milyon avro məbləğ müqabilində qiymətləndirir.
