“Real”ın baş məşqçisi Karlo Ançelotti İspaniya Super Kubokunun finalında “Barselona”ya məğlubiyyətdən sonra tənqidlərə cavabını açıqlayıb.
Arena.az xatırladır ki, həlledici oyunda “Barselona” “Real”ı 5:2 hesabı ilə darmadağın edib.
“Mən tənqid dalğasını izləmirəm, çünki bir gün dünyanın ən yaxşısı, ertəsi gün isə ən pisisən. Xoşbəxtlikdən, gərəkli tarazlığı qorumaq və bu dalğaya uymamaq təcrübəm var. Əgər bunu gözləməsən, kim olduğunu bilməyəcəksən”, – “Real”ın rəsmi saytı italyan mütəxəssisdən sitat gətirir.
Xatırladaq ki, “Barselona” “Real”ı məğlub etməklə, 15-ci dəfə İspaniya Super Kubokunu qənimətlər muzeyinə aparıb. Kataloniya klubu bu yarışın ən zəngin klubudur. “Real” isə 13 qənimətlə ikincidir.
Karlo Ançelotti məşqçiliyə 1992/1993-cü illər mövsümündə, İtaliya yığmasında baş məqşçinin köməkçisi olaraq başlayıb. 1995/1996-cı ilər mövsümündən isə italyan mütəxəssis müstəqil surətdə məşqçiliyə baş vurub.
Xatırladaq ki, 65 yaşlı italyan mütəxəssisin “Real”la ilk macərası 2013-2015-ci illəri əhatə edib. Daha sonra 2021-ci ildə “Kral klubu”na geri qayıdaraq, Ançelotti indiyədək “qaymaqlılar”ı çalışdırır. Karlo Ançelottinin İspaniya nəhəngi ilə müqaviləsi 2026-cı ilin iyun ayının sonuna qədər qüvvədədir.
Rəhbərliyi müddətində Ançelotti “Real”ı 321 oyuna çıxarıb, 231 qələbə, 45 heç-heçə, 45 məğlubiyyət yaşayıb. İtalyan mütəxəssisin rəhbərliyi altında “qaymaqlılar”ın top fərqi isə 775:306 nisbətindədir.
Təcrübəli mütəxəssisin rəhbərliyi altında “Real”ın qazındığı qalibiyyətlərə İspaniya La Liqası (2021/2022, 2023/2024), İspaniya Kral Kuboku (2013/2014, 2022/2023), İspaniya Super Kuboku (2021/2022, 20223/2024), Çempionlar Liqası (2013/2014, 2021/2022, 2023/2024), UEFA Super Kuboku (2014, 2022, 2024) və FIFA Klub Dünya Kuboku (2014, 2022) və FIFA Qitələrarası Kubok (2024) daxildir.
Karlo Ançelottinin məşqçilik məktəbindən həmçinin “Everton”, “Napoli”, “Bayern”, PSJ, “Çelsi”, “Milan”, “Yuventus”, “Parma” və “Recana” keçiblər.
