“Real”ın baş məşqçisi, italyan mütəxəssis Karlo Ançelotti Madrid klubunu tərk edəcəyi ilə bağlı yayılmış xəbərləri cavablayıb.
Arena.az nüfuzlu italyan jurnalist-insayder Fabritsio Romanoya istinadən, italyan mütəxəssisin bu barədə fikrini təqdim edir:
“Mən “Real”dan ayrılmaq qərarına qətiyyən gəlməmişəm. Ümidvaram ki, prezident Florentino Peres (Peres vəzifəsinə yenidən seçilib – redaktorun qeydi) kimi daha dörd il klubda qalacağam. 2029-cu ildə birlikdə böyük bir vida etmək mükəmməl olardı!”, deyə Ançelotti “iştahasını” ortaya qoyub.
Xatırladaq ki, bundan əvvəl mətvuatda, Ançelottinin cari mövsümün sonunda “Real”ın baş məşqçisi vəzifəsini tərk edəcəyi haqda müxtəlif səpgili xəbərlər yayılıb. Mətbuat “qaymaqlılar”In sükanı arxasına “Real”ı keçmiş futbolçusu, hazırda Leverkuzen “Bayer”ini çalışdıran ispan mütəxəssis Xabi Alonsonu “təyin etmişdi”.
Karlo Ançelotti məşqçiliyə 1992/1993-cü illər mövsümündə, İtaliya yığmasında baş məqşçinin köməkçisi olaraq başlayıb. 1995/1996-cı ilər mövsümündən isə italyan mütəxəssis müstəqil surətdə məşqçiliyə baş vurub.
Xatırladaq ki, 65 yaşlı italyan mütəxəssisin “Real”la ilk macərası 2013-2015-ci illəri əhatə edib. Daha sonra 2021-ci ildə “Kral klubu”na geri qayıdaraq, Ançelotti indiyədək “qaymaqlılar”ı çalışdırır. Karlo Ançelottinin İspaniya nəhəngi ilə müqaviləsi 2026-cı ilin iyun ayının sonuna qədər qüvvədədir.
Rəhbərliyi müddətində Ançelotti “Real”ı 323 oyuna çıxarıb, 233 qələbə, 45 heç-heçə, 45 məğlubiyyət yaşayıb. İtalyan mütəxəssisin rəhbərliyi altında “qaymaqlılar”ın top fərqi isə 784:309 nisbətindədir.
Təcrübəli mütəxəssisin rəhbərliyi altında “Real”ın qazındığı qalibiyyətlərə İspaniya La Liqası (2021/2022, 2023/2024), İspaniya Kral Kuboku (2013/2014, 2022/2023), İspaniya Super Kuboku (2021/2022, 20223/2024), Çempionlar Liqası (2013/2014, 2021/2022, 2023/2024), UEFA Super Kuboku (2014, 2022, 2024) və FIFA Klub Dünya Kuboku (2014, 2022) və FIFA Qitələrarası Kubok (2024) daxildir.
Karlo Ançelottinin məşqçilik məktəbindən həmçinin “Everton”, “Napoli”, “Bayern”, PSJ, “Çelsi”, “Milan”, “Yuventus”, “Parma” və “Recana” keçiblər.
