İngiltərə Premyer Liqasının “Çelsi” ilə 23-cü tur ev oyunu “Mançester Siti”nin braziliyalı qapıçısı Ederson Moraes üçün əlamətdar olub.
Arena.az “Squawka” dərgisinə istinadən məlumat verir ki, Ederson qapıçılar arasında məhsuldar ötürmələrin sayına görə İngiltərə Premyer Liqasının rekordunu təkrarlayıb.
Bu oyunda Ederson İngiltərə Premyer Liqasında özünün 5-ci məhsuldar ötürməsini gerçəkləşdirib. Əvvəllər Premyer Liqada 5 məhsuldar ötürmə vermiş yeganə qapıçı “Tottenhem” və “Lids”in ingilis keçmiş qapıçısı Pol Robinson idi.
Ederson Moraes “San-Paulu”nun yetirməsidir. Avropada “Benfika”nın heyətində diqqət çəkmiş braziliyalı qapıçını “şəhərlilər” 2017-ci ilin iyulunda 40 milyon avro məbləğ müqabilində öz düşərgəsinə qatıblar. Edersonun “Mançester Siti” ilə müqaviləsi 2026-cı ilin iyun ayının sonuna qədər qüvvədədir.
Ederson cari mövsümdə “Mançester Siti”nin heyətində 22 oyuna çıxıb, 34 qol buraxıb, 5 oyundan “quru” qurtulub.
Braziliyalı qapıçının “şəhərlilər”in heyətində çıxışının ümumi mənzərəsi 341 oyun, 266 buraxılmış qol, 157 “quru” oyundan ibarətdir.
Ederson “Mançester Siti” ilə bütün mümkün klub yarışlarında qələbə qazanıb. Braziliyalı qapıçı “şəhərlilər”lə İngiltə Premyer Liqasının 6 qat, İngiltərə Kubokunun 2 qat, İngiltərə Liqa Kubokunun 4 qat, İngiltərə Super Kubokunun 2 qat, Çempionlar Liqasının, UEFA Super Kubokunun, FIFA Klub Dünya Kubokunun qalibi olub. Edersonun həmçinin “Benfika” ilə 2 qat Portuqaliya çempionluğu, Portuqaliya Kubokunda, Portuqaliya Liqa Kubokunda, Portuqaliya Super Kubokunda qalibiyyətləri var.
Ederson Moraes 2017-ci ilin oktyabrında debüt etdiyi Braziliya yığmasının heyətində 29 oyuna 21 qol buraxıb, 13 təmiz oyun keçirib. Edersonun “selesao”nun heyətində bu qədər az oyun keçirməsinin də səbəbi var. Məsələ burasındadır ki, Ederson “selesao”nun heyətində “Liverpul”un qapıçısı Alisson Bekerin əvezedici rolunda çıxış edib. Buna rəğmən, Ederson Braziliya millisi ilə 2019 Amerika Kubokunun qalibi olub.
“Transfermarkt” internet-portalı 31 yaşlı braziliyalı qapıçının transfer dəyərini 30 milyon avro məbləğində qiymətləndirir.
