Alimlər 76 milyon illik pterozavr balasının fosilində timsah kimi heyvanın hücumunun izlərini aşkar ediblər.
Hafta.az-ın “IFLScience”a istinadən yazdığına görə, Kanadanın Alberta ştatında çalışan paleontoloqlar Azhdarchidae ailəsindən olan pterozavrın boyun sümüyü tapıblar. Dinozavrlarla yanaşı yaşayan bu pterozavrlar ailəsi indiyə qədər səmada uçan ən böyük heyvanlar idi.
Təxminən 76 milyon il əvvələ aid edilən boyun sümüyünün Cryodrakon boreas cinsinin bir balacasına aid olduğu müəyyən edilib. Yetkinlik yaşına çatmayanların qanadının 2 metr uzunluğunda olduğu təxmin edilərkən, bu növün böyüklərinin qanadları 10 metrə qədər idi.
Sümükləri araşdıran elm adamları onun üzərində 4 millimetrlik dişləmə izi görüblər.
Kanada Kral Tirrell Paleontologiya Muzeyindən Dr. Kaleb Braun "Pterozavr sümükləri çox incədir, ona görə də başqa bir heyvanın dişləməsi olan fosillər olduqca nadirdir" deyib və əlavə edib: “Bu nümunənin yeniyetmə olması onu daha da nadir hala gətirir”.
Pterozavr balasına hücum "cinayətini" törədən heyvanın Alligatoridae ailəsinə aid Leidyosuchus canadensis növündən olduğu təxmin edilir. Bu ailənin heyvanları indiki timsahların və kaymanların əcdadları olub. Reading Universitetindən Dr. Brayan Rikls "Bunlar, yəqin ki, müasir timsahlara yaxın olan orta ölçülü timsahlar olub. Timsahların güclü dişləmə qüvvələri yaratmaq üçün təkamül keçirdiklərini nəzərə alsaq, diş deşmə izini görə bildiyimiz, lakin onurğanın qalan hissəsinin toxunulmaz olduğu bir nümunə tapmaq təəccüblüdür" deyib.
Yeni tədqiqat 76 milyon il əvvəl yırtıcı-ov dinamikası haqqında mühüm fikir verir. Dişləmə izinin pterozavrın ölümündən əvvəl və ya sonra qaldığı bəlli deyil. Bununla belə, tapıntılar göstərir ki, timsahların əcdadı bala pterozavrları ovlayır və ya onların cəsədləri ilə qidalanırdı.
