Avropa Komissiyası (AK) Ukrayna ilə qazın Avropaya tranziti ilə bağlı danışıqları davam etdirəcək və bu danışıqlara Macarıstanla Slovakiyanı da cəlb edəcək.
Sfera.az xəbər verir ki, bu barədə “Reuters” agentliyi adını açıqlamadığı avropalı diplomata istinadən xəbər verib.
“Komissiya Ukraynanın qaz kəmərləri sistemi vasitəsilə Avropaya tədarüklə bağlı Ukrayna ilə danışıqları davam etdirməyə hazırdır”, - deyə məlumatda bildirilib.
Agentliyin mənbəsinin sözlərinə görə, AK Slovakiya ilə birlikdə Macarıstanı da bu prosesə cəlb etməyə hazırdır.
Xatırladaq ki, yanvarın 24-də Macarıstanın Baş naziri Viktor Orban Avropa İttifaqına səslənərək Macarıstan və Slovakiyaya enerji nəqlini əngəlləyən Ukraynaya qarşı öz üzv dövlətlərinin maraqlarını müdafiə etməyə çağırmışdı.
Orban, Ukraynanın enerji daşımalarına maneə törətməsinin Avropa İttifaqının daxili bazarını zədələdiyini və regiondakı enerji təhlükəsizliyinə ciddi təsir etdiyini vurğulamışdı. O, həmçinin, Avropa İttifaqının bu məsələyə diqqət yetirməli olduğunu və üzv ölkələrin öz milli maraqlarını qorumaq hüququna sahib olduğunu deyib.
Macarıstanın bu çağırışı, Ukrayna ilə enerji nəqli üzərində yaranan gərginliyin böyüdüyü bir dövrə təsadüf edir. Macarıstan və Slovakiya, xüsusilə Rusiyadan enerji təchizatı ilə bağlı asılılıqlarını davam etdirmək istəyirlər, lakin Ukraynanın bu sahədəki maneələri və Avropa İttifaqının digər üzv ölkələrinin Ukraynanın mövqeyini dəstəkləməsi enerji siyasətində mübahisələrə səbəb olub.
Vasif
