“BP-Azerbaijan” şirkəti 2025-ci ildə Xəzər dənizinin Azərbaycan sektorunda yerləşən “Şahdəniz” qaz yatağında seysmik kəşfiyyat proqramını həyata keçirməyi planlaşdırır.
Bu barədə “Report”a şirkətdən məlumat verilib.
Şirkətdən bildirilib ki, proqram çərçivəsində qaz laylarında baş verən dəyişikliklərin monitorinqi məqsədilə silsilə seysmik tədqiqatlar aparılacaq: "Tədqiqatlar “Şahdəniz 2025-2034” seysmik kəşfiyyat proqramına uyğun şəkildə həyata keçiriləcək".
Bundan əlavə, “BP-Azerbaijan” “Şahdəniz” yatağının işlənməsi üzrə “Mərhələ-2” çərçivəsində 2027-ci ilədək “Shah Deniz Bravo” platformasından əlavə quyuların qazılması və tamamlanmasını planlaşdırır.
2024-cü ilin üçüncü rübünün sonuna qədər “Mərhələ-2” çərçivəsində qazılması nəzərdə tutulan 26 quyudan 21-i artıq qazılıb. Bununla bağlı qazma işləri müxtəlif cinahlarda aparılıb: şimal cinahında 5, qərb cinahında 4, cənub-şərq cinahında 4, cənub-qərb cinahında 5 və şimal-şərq cinahında 3 quyu qazılıb.
Qeyd edək ki, 2013-cü il dekabrın 17-də “Şahdəniz” konsorsiumu “Mərhələ-2” layihəsi üzrə yekun investisiya qərarını təsdiqləyib. Bu layihə çərçivəsində Azərbaycandan Avropaya qaz nəqli həyata keçirilir.
Hazırda yataqda qaz və kondensat hasilatı “Mərhələ-1” çərçivəsində “Shah Deniz Alpha” platformasından, “Mərhələ-2” çərçivəsində isə “Shah Deniz Bravo” platformasından həyata keçirilir. Qaz hasilatına isə 2006-cı ilin dekabrında başlanılıb.
