Süni intellekt son illərdə bir çox sahədə işləri asanlaşdırmaq və sürətləndirmək məqsədilə geniş şəkildə istifadə olunur. Kod yazımında da bu texnologiyanın tətbiqi artmaqda davam edir. Bir çox İT mütəxəssisləri kod yazımında sün intellekt sistemlərindən faydalanır.
Bu zaman sual yarana bilər ki, kod yazılımında süni intellektdən istifadə etmək nə dərəcədə güvənli hesab edilir?
İT mütəxəssisi Vahid Qasımov Valyuta.az-a açıqlamasında bildirdi ki, kod yazma prosesi süni intellekt vasitəsilə daha sürətli və effektiv şəkildə həyata keçirilə bilər və bu, müasir iş dünyasında vacibdir:
“Süni intellekt bizə nəticələri ona verilən tapşırıq və təlimatlara əsasən verir. Heç bir süni intellekt özü kod yaza bilməz, bütün əməliyyatlar ona verilən göstərişlərə uyğun olaraq həyata keçirilir. Buna görə də, əldə olunan kodun keyfiyyəti birbaşa süni intellektə verilən tapşırığın dəqiqliyi, tamlığı və təzadlardan azad olmasına bağlıdır. Çox vaxt süni intellektdən alınan kodun keyfiyyəti, ona sorğu verənin peşəkarlığı ilə əlaqədardır. Deməli, əldə edilən kod da istifadəçinin səviyyəsini əks etdirir, yəni hər kəs öz bacarıq səviyyəsinə uyğun nəticə əldə edir”.
Mütəxəssis qeyd edib ki, süni intellekt internetdə mövcud olan kodlardan istifadə edərək onları kompilyasiya edir və nəticəni təqdim edir:
“İnternetdəki real kodlar isə müxtəlif səviyyələrdəki proqramçılar tərəfindən yazıldığı üçün, həmin kodlarda xətalar və ya güvənlik problemləri ola bilər. Buna görə də, süni intellektin təqdim etdiyi kodlar da real nəticələrlə tam uyğun olur və onların keyfiyyəti mövcud olan kodların səviyyəsinə bağlıdır”.
V.Qasımov kodu süni intellektlə yazılan sistemlərdə sonrakı dövrlərdə hansısa problemin yarana bilməsi ilə bağlı da danışıb:
“Proqram təminatının heç biri əvvəldən ideal olmur. Hər bir məhsulun əvvəlcə sınaq versiyası buraxılır, burada səhvlər və bug-lar aşkar edilir və düzəldilir. Sonra ilk versiya bazara təqdim olunur. İstifadəçilərdən gələn iradlar və təkliflər əsasında düzəlişlər və əlavələr edilir. Nəticədə proqramın 2-ci, 3-cü, 4-cü və digər versiyaları çıxır və hər birində yeni düzəlişlər edilir.
Məhsullar süni intellekt yardımı ilə yaradılarsa da, inkişaf prosesi dəyişməməlidir. Səhvlər, problemlər, bug-lar və digər çatışmazlıqların mövcudluğu qaçınılmazdır. Lakin bu, tamamilə normal haldır və məhsulun zamanla düzəldilməsi, təkmilləşdirilməsi və inkişaf etdirilməsi çox təbii prosesdir”.
Maya Hüseynova
