Bu məsələ AFFA İcraiyyə Komitəsinin son iclasında da müzakirə olunub. Bəs limit götürüləcəksə, ölkənin əsas və U-21 yığmasının heyəti necə formalaşdırılacaq? Yerli futbolçular legioner həyatına həvəs göstərəcək, yoxsa karyerasını 1-2-ci liqalarda davam etdirəcək?
“Football-plus.az” bu sualları tanınmış menecer Erkin İbrahimova ünvanlayıb:
“Hazırda bizim futbolun problemi legioner limiti deyil. Elə məsələlər var ki, daha çox onların üzərinə düşmək lazımdı. Legioner limiti problemdisə, onda 15-ci problemdi. Bu məsələni həll etmək istəmələri mənə çatmır. Heç kimə xoş deyil ki, 11 legioner oynasın. Bəzi yerli futbolçular əziyyət çəkmədən oynayırlar. Hansısa ortaq məxrəcə gəlmək lazımdı. Birdən-birə limiti ləğv etmək düzgün deyil. Bu məsələnin bir üstünlüyü o olacaq ki, 1-ci liqa daha da güclənəcək. 1-ci liqanın səviyyəsində ciddi artım var. Belə getsə, 1-ci liqa ilə premyer-liqa arasında olan fərq yox olacaq. Müsbət yön kimi bunu deyə bilərəm. U-19-un futbolçularının hamısı əvəzedicilərdə oynayır. Federasiya pedaqoq rolunu oynamalıdı. Nə qədər U-19, U-21 futbolçularını oynatsan, bir o qədər də bonus alacaqsan. Həmişə alternativlər olmalıdı. Futbol canlı orqanizm kimidi. Balanslaşdırılmış şəkildə olmalıdı, yoxsa fəsadları gözləmədiyimiz kimi ola bilər. Yəqin ki, federasiya bütün bunları nəzərə alıb”.
ƏSƏD SEYİDOV
