"Fergani" layihəsi Türk dünyasının qlobal kosmos tədqiqatları sahəsində artan potensialını nümayiş etdirir.
"Report"un Türkiyə bürosu xəbər verir ki, bu, Türk Dövlətləri Təşkilatının (TDT) Baş Katibliyindən "Fergani Space"in ilk peykinin kosmosa buraxılması ilə bağlı təbrik mesajında qeyd edilib.
Bildirilib ki, "Baykar" şirkətinin İdarə heyətinin sədri Səlcuq Bayraktarın rəhbərliyi ilə əldə edilən bu uğur Türk dünyasının yaradıcılığını və əzmini göstərir:
“Cənab Bayraktarın Türk dünyasının parlaq gənc beyinləri ilə paylaşdığı bu vizyonun həyata keçirilməsini görmək xüsusilə sevindiricidir. Kökləri uzun illər bəslənən arzuya söykənən bu uğur bütün Türk dünyası üçün böyük qürur mənbəyidir. Bu layihə Fərqani və Uluq bəy kimi alimlərin irsini yad edir, ortaq elmi irsimizi yaşatmaqla gələcək nəsilləri ruhlandırır, eyni zamanda Türk dünyasının qlobal kosmik tədqiqatlar sahəsində artan potensialını nümayiş etdirir”, - deyə məlumatda vurğulanıb.
Həmçinin, qeyd olunub ki, bu məsələ həm də TDT-yə üzv dövlətlər arasında kosmik texnologiyalar sahəsində əməkdaşlığın inkişafında mühüm addımdır:
“TDT Katibliyi bu mühüm sahədə əməkdaşlığı inkişaf etdirmək üçün qərarlı olduğunu bir daha təsdiqləyir. Kosmik tədqiqatlar sahəsində birgə imkanlarımızı gücləndirmək üçün təcrübə və texniki mübadilə üçün platforma təmin etməyi hədəfləyirik”.
