Olaylar.az xəbər verir ki, Sky News-a müsahibəsində Araqçi Trampın təklifini ələ salıb və bu təklifin regionda geniş qəzəb doğurduğunu vurğulayıb:
"Fikrim tamamilə fərqlidir. Fələstinlilər yerinə israilliləri köçürməyi sınayın. Onları Qrenlandiyaya göndərin ki, bir güllə ilə iki dovşan vura biləsiniz," - deyə o bildirib.
Araqçi həmçinin İsrailin ABŞ-nin dəstəyi ilə İranın nüvə proqramına mümkün hücumu ilə bağlı yayılan iddialara da toxunub:
"Biz aydın şəkildə bildirmişik ki, nüvə obyektlərimizə ediləcək hər hansı bir hücum dərhal və qətiyyətli cavabla qarşılaşacaq. Lakin onların belə bir ağılsız addım atacağına inanmıram. Bu, həqiqətən dəli hərəkət olar və bütün regionu böyük bir fəlakətə sürükləyər," - deyə nazir əlavə edib.
Nazir həmçinin Trampın təkliflərini dinləməyə hazır olduqlarını, lakin yeni danışıqlara başlamaq üçün ilk nüvə razılaşması təcrübəsinin yaratdığı etibarsızlığın aradan qaldırılması üçün daha çox səylərin lazım olduğunu qeyd edib.
Bu açıqlama, İran, İsrail və ABŞ arasında onsuz da gərgin olan münasibətlərə yeni bir çalar əlavə edərək beynəlxalq arenada müzakirələrə səbəb ola bilər.
