UEFA Çempionlar Liqasının Liqa mərhələsinin 8-ci turunun “Brest”lə (Fransa) oyun “Real”ın baş məşqçisi Karlo Ançelotti üçün əlamətdar olub.
Arena.az xəbər verir ki, italiyalı mütəxəssis İspaniya klubunun tarixi rekordunu təkrarlayıb.
Bu barədə Madrid təmsilçisinin mətbuat xidməti məlumat yayıb.
“Real” UEFA Çempionlar Liqasının Liqa mərhələsinin 8-ci turunda qarşılaşdığı “Brest”lə oyunda 3:0 hesablı qələbəyə sevinib. Bu görüş “Real”ın Ançelottinin rəhbərliyi altında çıxdığı 71-ci ÇL matçı olub. Bu isə klub rekordunun təkrarlanması deməkdir.
Daha əvvəl İspaniya təmsilçisi Miqel Munyosun (1959, 1960-1974-cü illər) baş məşqçiliyi altında UEFA Çempionlar Liqasında 71 görüş keçirmişdi. Ançelottinin “Real”la növbəti ÇL qarşılaşması onu mütləq rekordçuya çevirəcək.
Xatırladaq ki, “Real” ÇL-in Liqa mərhələsinin yekun sıralamasında 11-ci yeri tutaraq pley-offa vəsiqə qazanıb.
Karlo Ançelotti məşqçiliyə 1992/1993-cü illər mövsümündə, İtaliya yığmasında baş məqşçinin köməkçisi olaraq başlayıb. 1995/1996-cı ilər mövsümündən isə italyan mütəxəssis müstəqil surətdə məşqçiliyə baş vurub.
Xatırladaq ki, 65 yaşlı italyan mütəxəssisin “Real”la ilk macərası 2013-2015-ci illəri əhatə edib. Daha sonra 2021-ci ildə “Kral klubu”na geri qayıdaraq, Ançelotti indiyədək “qaymaqlılar”ı çalışdırır. Karlo Ançelottinin İspaniya nəhəngi ilə müqaviləsi 2026-cı ilin iyun ayının sonuna qədər qüvvədədir.
Rəhbərliyi müddətində Ançelotti “Real”ı 325 oyuna çıxarıb, 235 qələbə, 45 heç-heçə, 45 məğlubiyyət yaşayıb. İtalyan mütəxəssisin rəhbərliyi altında “qaymaqlılar”ın top fərqi isə 792:310 nisbətindədir.
Təcrübəli mütəxəssisin rəhbərliyi altında “Real”ın qazandığı qalibiyyətlərə İspaniya La Liqası (2021/2022, 2023/2024), İspaniya Kral Kuboku (2013/2014, 2022/2023), İspaniya Super Kuboku (2021/2022, 20223/2024), Çempionlar Liqası (2013/2014, 2021/2022, 2023/2024), UEFA Super Kuboku (2014, 2022, 2024) və FIFA Klub Dünya Kuboku (2014, 2022) və FIFA Qitələrarası Kubok (2024) daxildir.
Karlo Ançelottinin məşqçilik məktəbindən həmçinin “Everton”, “Napoli”, “Bayern”, PSJ, “Çelsi”, “Milan”, “Yuventus”, “Parma” və “Recana” keçiblər.
