Bakı, 31 yanvar, AZƏRTAC
Yaponiyada ardıcıl qiymət artımları nəticəsində inflyasiya tempinin sürətlənməsi ilə bir çox istehlakçı əsas ərzaq məhsulları almaq üçün yaradıcı həll yolları axtarır.
AZƏRTAC xəbər verir ki, bu ay paytaxt Tokioda kələmin orta qiyməti ötən illə müqayisədə üç dəfədən çox artıb.
Keçən həftə Yaponiya Bankı maaş proqnozuna inamı əsas gətirərək faiz dərəcələrini son 17 ilin ən yüksək səviyyəsinə qaldırdı. “Reuters” agentliyi xəbər verir ki, inflyasiyaya uyğunlaşdırılmış maaşlar son otuz iki ayın iyirmi doqquzunda azalıb, “Engel” əmsalı və ya ev təsərrüfatlarının ərzaq xərclərinin payı keçən il son dörd onilliyin ən yüksək həddinə çatıb.
Tokioda bir baş kələmin qiyməti təxminən bir saatlıq əməkhaqqına bərabər olan 6,43 dollardır və bu, cümə günü açıqlanan məlumatlardan əvvəl artıq mediada başlıqlara çevrilib. Mərkəzi Bank keçən həftə qeyd edib ki, düyü 2026-cı ilin yazına qədər baha qiymətə satılacaq. Dekabrda bu məhsulun topdansatış qiymətləri ötən ilin eyni dövrü ilə müqayisədə 60 faiz artıb.
Kənd təsərrüfatı məhsullarının qiymətləri artdıqca, yaponlar onları daha az istehlak etməyə başlayıblar. Hökumətin son məlumatlarına görə, Yaponiyada böyüklər arasında orta tərəvəz istehlakı noyabr ayında rekord aşağı səviyyəyə düşüb.
Bu arada, düyü üzərinə səpilmiş ucuz “furikake” və ya qurudulmuş ədviyyatlar şam süfrəsində digər yeməklərin əvəzi kimi istifadə olunur. “Fuci Keizai” araşdırma firmasının məlumatına görə, ərzaq məhsulları satışlarının rekord həddə çatacağı gözlənilir.
Artan qiymətlərin seçicilərin əhvali-ruhiyyəsinə təsirindən narahat olan hökumət keçən il aşağıgəlirli ev təsərrüfatlarına nağd ödənişlərin daxil olduğu iqtisadi stimul paketi təqdim edib.
Bundan başqa, Kənd Təsərrüfatı Nazirliyi pərakəndə satış qiymətlərini aşağı salmaq məqsədilə hökumətə düyü ehtiyatlarını kənd təsərrüfatı kooperativlərinə satmağa imkan verən yeni qaydaları nəzərdən keçirir.
