Bakı, 31 yanvar, AZƏRTAC
“Şəki” basketbol klubu ardıcıl 8 qələbə qazanmaqla yeni rekorda sahib çıxıb.
Bölgə təmsilçisinin mətbuat xidmətindən AZƏRTAC-a verilən məlumata görə, komanda bununla son 3 mövsümdə heç bir klubun edə bilmədiyi nəticəyə imza atıb.
“Şəki” dekabrın 1-də Gəncədə yerli komandaya məğlubiyyətdən bəri yenilgi üzü görməyib. Bu müddətdə keçirilən bütün 8 qarşılaşma şəkililərin qələbəsi ilə başa çatıb.
Bedri Meriçin komandası hazırda A qrupunun lideri və son ölkə çempionu "Sabah"la bərabər cari mövsümün ən az məğlubiyyət üzü görən komandasıdır. Bu, cəmi 2 dəfə baş verib. 2022/2023 mövsümündə 2, 2023/2024 mövsümündə cəmi 1 qələbəsi olmuş "Şəki' cari mövsüm artıq 10 qalibiyyətə sevinib.
Həmçinin səbətə atılan 1046 xal göstəricisində də "Şəki" liderdir. Ötən tur "Ordu"nu məğlub edən "Şəki" bu göstəricidə məhz "hərbçilər"ə çataraq şərikli liderliyə nail olub. 3-cü belə ən yaxşı nəticə də B qrupunun təmsilçisi "Gəncə"dədir – 1024 xal.
Xal atışında müsbət top fərqi də (1046:876=+170) "Şəki"yə məxsusdur. Maraq üçün bildirək ki, bu göstəricidə "Gəncə" (+148) 2-ci, "Sabah" (+145) 3-cüdür.
"Şəki" ötən mövsüm martın 17-də öz meydanında "Sumqayıt"a uduzduqdan sonra ardıcıl 7 ev matçında məğlub olmur. Aprelin 14-də "Gəncə" üzərində qələbə (82:73) ilə başlayan bu uğurlu seriya cari mövsümdə hələ ki qırılmayıb.
Əgər “Şəki” sabah "Sumqayıt"la görüşdə xal itirməsə, bu, ardıcıl 9-cu qələbə və 8-ci ev zəfəri kimi tarixə düşəcək.
