Madrid “Real”ının 26 yaşlı fransalı ulduz mərkəz hücumçusu Kilian Mbappe meydandakı mövqeyi ilə bağlı sualı cavablayıb.
Arena.az məlumat verir ki, fransalı ulduz bu barədə jurnalsit Ane Pastora müsahibəsində danışıb:
– Meydanda sizin mövqeyinizlə bağlı mübahisələr gedir. Kristiano Ronaldonun da adı ətrafında müvafiq söz-söhbət vardı. Bu, sizə necəsə təsir edirmi?
– Əsla, yox. Siz Ronaldo haqda danışırsınız, o hücumun hər üç mövqeyində necə oynamaq lazım gəldiyini bilirdi. Mən də üç mövqedə çıxış etmişəm. Məsələ bunda deyil, komanda yoldaşları ilə ümumi dil tapa bilmək bacarığında, oyundan zövq almaqdadır… Bu, mənim üçün ən vacib olanıdır. Qalanları – bunlar sadəcə müzakirələrdir…
Kilian Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib.
2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-yə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Kilian PSJ tarixinin ən sərrast futbolçusudur.
Mbappe 2024-cü ilin iyul ayında PSJ-dən azad agent qismində ayrılaraq “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində 47 oyuna çıxıb, 33 qol vurub, 5 məhsuldar ötürmə verib.
Kilian Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 88 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
Klub səviyyəsində Mbappe PSJ ilə 6 dəfə və “Monako” ilə 1 dəfə Fransa Liqa 1-in, 4 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin dəfələrlə müxtəlif fərdi mükafatlara layiq görülüb. “Real”la isə Mbappe UEFA Super Kubokunun (2024) və FIFA Qitələrarası Kubokun (2024) qalibi olub.
“Transfermarkt” internet-portalı 26 yaşlı fransalı hücumçunun transfer dəyərini 160 milyon avro məbləğində qiymətləndirir.
