“Bizim həkimlərdən çoxu Sovet təhsili aldığı üçün bu üsulu tətbiq edirdilər”

"Qeysəriyyə əməliyyatı qarın divarı və uşaqlığın kəsilməsi ilə baş tutur. Uşaq çıxarıldıqdan sonra uşaqlıq divarındakı kəsik tikilir. Toxumaların birləşməsi uzun müddət tələb etmir. Ancaq əvvəlki vəziyyətə qayıtmaq heç zaman mümkün olmur. Yaranan çapıq toxumasının güvənə biləcəyimiz qədər möhkəm olması üçün birinci əməliyyatdan ən az iki il sonraya qədər ikincinin olmamasını məsləhət görürük".

Bu sözləri Demokrat.az-a açıqlamasında tanınmış həkim Rəşad Sultan deyib.

O bildirib ki, hamiləlik yenidən baş verdikdə uşaqlıq böyüyür, genişlənir:

"Hamiləliyin ilk günlərindən başlayaraq uşaqlıqda yığılmalar baş verir. Sona doğru yığılmalar artır və uşaqlığın yırtılması təhlükəsi yaranır. Tibbdə hər məsələ olduğu kimi bu da mübahisəli məsələdir. Risk o qədər deyil ki, qısa müddətdə hamilə qalan qadınlara uşağı düşürtməyi məsləhət görək. Bəzi həkimlər bu təklifləri edirlər. Qadınlar qorxur və riskə getmək istəmirlər".

Onun sözlərinə görə, əvvəllər qeysəriyyə çapığının ölçülməsi məsələsi var idi:

"Bu daha çox Sovet səhiyyəsinin tətbiq etdiyi üsul idi. Çapığın böyüklüyü və qalınlığı ölçülürdü. Bizim həkimlərdən çoxu orada təhsil aldığı üçün bu üsulu tətbiq edirdilər. Qərb səhiyyəsində və sübuta əsaslanan tibbdə belə anlayış yoxdur. Azərbaycan Türkiyə təhsilli həkimlər artdıqca çapığın ölçülməsi məsələsi ləğv edilib.

Xəstənin vəziyyəti daha çox klinik olaraq dəyərləndirilir. Xəstənin ağrılarına, gedişata görə qərar verilir. Çapığın qalınlığına görə qərar vermək hiperdiaqnostika olur. Nəticədə həddən artıq xəstəxana yatışı, vaxtından əvvəl müdaxilələr olur. Bu üsul tibbi cəhətdən əsaslandırılmayıb".

Qeyd edək ki, Respublika Klinik Xəstəxanasında ana ölümü qeydə alınıb. Tibbi Ərazi Bölmələrini İdarəetmə Birliyindən bildirilib ki, pasiyent xəstəxanaya hospitalizasiya edilərkən əvvəlki qeysəriyyə çapığı bölgəsində şiddətli ağrılar hiss etdiyini bildirib.

Əfsanə Kamal
Demokrat.az

“Bizim həkimlərdən çoxu Sovet təhsili aldığı üçün bu üsulu tətbiq edirdilər” — AÇIQLAMA

Hesaba daxil ol

Qeydiyyatdan keç

Şifrəni bərpa et