Amerikada sərnişin təyyarəsi ilə hərbi helikopter toqquşdu

 

  Amerika Birləşmiş Ştatlarının paytaxtı Vaşinqton yaxınlığında 60 sərnişin və 4 ekipaj üzvü daşıyan sərnişin təyyarəsi ilə 3 hərbi personalın olduğu hərbi helikopter havada toqquşaraq çaya düşdüyü qəzada 18 nəfər həyatını itirib. 

  ABŞ Federal Aviasiya İdarəsinin (FAA) yaydığı yazılı açıqlamaya görə, Ronald Reyqan Hava Limanı yaxınlığında bir sərnişin təyyarəsi ilə hərbi helikopter toqquşub. "American Airlines" şirkətinə məxsus sərnişin təyyarəsi və hərbi helikopter toqquşmadan sonra Potomak çayına düşüb. Havanın və çayın olduqca soyuq olması səbəbindən sağ qalma ehtimalı olanları xilas etmək üçün xilasedicilər vaxtla yarışır. "CBS News"a danışan bir rəsminin bildirdiyinə görə, çaydan 18 nəfərin cansız bədəni çıxarılıb.

  Hava limanında bütün uçuşlar dərhal dayandırılıb və bölgədə təhlükəsizlik tədbirləri görülüb. Qəza ilə bağlı tədqiqat başladılıb.

  Qəza ilə bağlı yazılı açıqlama verən prezident Donald Tramp hadisəni yaxından izlədiyini və insanların xilas olması üçün dua etdiyini bildirib. 

  Hadisəyə ilk müdaxilə edən əməkdaşlara təşəkkür edən Tramp yeni məlumatlar olduqca bunları paylaşacaqlarını qeyd edib. Daha sonra "Truth Social" sosial media platformasında açıqlama verən prezident təyyarənin öz marşrutu üzrə enişə keçdiyini bildirərək "Helikopter uzun müddət birbaşa təyyarəyə doğru hərəkət edirdi. Hava açıq idi və təyyarənin işıqları yanırdı. Nəzarət qülləsi təyyarəni görüb-görmədiklərini soruşmaq əvəzinə, niyə helikopterə nə etməli olduğunu bildirmədi? Qarşısı alına biləcək bir qəza idi. Bu, yaxşı hal deyil" deyə qiymətləndirmə aparıb.

• QÉ™za
• VaÅŸinqton
• ToqquÅŸma
• SÉ™rniÅŸin TÉ™yyarÉ™si
• HÉ™rbi Helikopter