"Football-plus.az" xəbər verir ki, kataloniyalılar 5 qoldan dördünü fasiləyə qədər vurdu. Hərçənd oyun onlar üçün çox pis başladı. “Barsa” artıq 5-ci dəqiqədə qapısında qol gördü. Ancaq Mbappenin gözəl zərbəsi Flikin komandasını ruhdan salmadı, hissənin ortalarında bərabərlik təmin olundu.
Kamavinqanın Qaviyə qarşı kobudluğuna görə təyin olunan penaltini qola çevirən Levandovski komandasını önə keçirdi. Cəmi 3 dəqiqə sonra Rafinya 3-cü qolu vurdu. Bu da “Real”ın faciələrinin sonu deyildi. 45+10-cu dəqiqədə qurulan sürətli əks-hücum zamanı Kurtua 4-cü dəfə topu tordan çıxarmalı oldu. Komandalar paltardəyişmə otağından qayıdandan sonra “Barsa” 5-ci qolu da vurdu. Amma tezliklə Şensnı komandasını pis vəziyyətdə qoydu. Polşalı qapıçı Mbappeni cərimə meydançası xaricində yerə sərdiyinə görə meydandan qovuldu. Rodriqo dərhal qollardan birinin əvəzini çıxdı.
Düzdü, oyunu xilas etmək üçün “Real”ın sərəncamında yetərincə vaxt var idi. Madridlilərin ifasında dəfələrlə möhtəşəm geridönüş görmüşük. Ancaq bu dəfə paytaxt klunun sanki gücü qalmamışdı.
final
Barselona – Real 5:2
Barselona: Şensnı, Kunde, Kubarsi, Martines (Arauxo, 29), Balde, Kasado, Qavi (Penya, 59), Yamal (Olmo, 59), Pedri, Rafinya (Torres, 79), Levandovski.
Real: Kurtua, Vaskes (Asensio, 52), Çuameni (Modriç, 64), Rüdiger, Mendi (F.Qarsiya, 76), Kamavinqa (Sebalyos, 46), Valverde, Bellingem, Rodriqo, Mbappe, Vinisius (Dias, 76).
Qollar: Mbappe, 5 (0:1). Yamal, 22 (1:1). Levandovski, 36-p. (2:1). Rafinya, 39 (3:1). Balde, 45+10 (4:1). Rafinya, 48 (5:1). Rodriqo, 60 (5:2).
Vərəqələr: Kamavinqa, 35. İ.Martines, 45+8 (meydandan kənarda). Rüdiger, 53. Vinisius, 55. Çuameni, 62. Levandovski, 77. Asensio, 77. Arauxo, 87. Rafinya, 89 (meydandan kənarda) – sarı. Şensnı, 56 – qırmızı.
Hakim: Xesus Xil Mansano.
12 yanvar. Ciddə. “Kral Abdulla Sports Siti” stadionu. 62345 tamaşaçı.
Oyundan sonra
Hans-Diter Flik, “Barselona”nın baş məşqçisi:
“Barselona” ilə ilk titulu qazandığıma görə çox sevinirəm. Yaxşı çalışdıq, qürur duyuram. Həqiqətən də böyük komanda kimi oynayırıq. Geri baxmırıq, indiki zamanla yaşayırıq. Möhtəşəm komandamız var. Həmişə birliyi qoruyuruq, komanda kimi hücum edir və müdafiə olunuruq. Ən vacib olan budu”.
Karlo Ançelotti, “Real”ın baş məşqçisi:
“Pis gecə idi, bütün azarkeşlərimiz kimi biz də məyusuq. Məyusluğu gizlətməyə dəyməz, ancaq futbol belədi: bəzən qalib gəlirsən, bəzən məğlubiyyətdən öyrənməli olursan. İrəli baxmalıyıq, başqa yolumuz yoxdu. Ümumiyyətlə, “Real” oynamadı, planlarımızı heç cür meydanda həyata keçirə bilmədik. Pis müdafiə olunduq, bu oyundakı ən böyük problemimiz budu. Rəqib çox asan qollar vurdu, biz isə həm pressinq altında, həm də dərin müdafiəyə çəkiləndə pis hərəkət etdik. Fasilədə futbolçulara dedim ki, əvvəlcə futbol oynamağa çalışmaq lazımdı, ilk yarıdakı oyunumuz futbol deyildi. Yalnız uzun ötürmələrə güvəndirdik, bu bizim yol deyil. İdeya ondan ibarət idi ki, futbol oynayaq, ancaq bunu bacarmadıq. Oyunçulara dedim ki, uduzmaq olar, ancaq bizim ilk yarıda oynadığımız kimi yox”.
Robert Levandovski, “Barselona”nın hücumçusu:
“Əla oyun göstərdik. xüsusən də 1-ci hissədə. Azlıqda qalandan sonra çətinlik çəkdik, ancaq əsas odu ki, titul qazandıq. Bu gün titulu bayram edə bilərik, artıq sabahdan qarşıdakı oyunlara köklənməliyik. Bugünkü kimi oynasaq, dünyanın istənilən komandasını məğlub edə bilərik”.
Faktlar
* Ançelotti məşqçi karyerasında 11-ci dəfə “Barselono”ya uduzdu. O, kataloniyalıları 10 dəfə məğlub edib, daha 3 oyun heç-heçə bitib. Qeyd edək ki, italiyalı mütəxəssis “İnter”lə “Yuventus”a da 11 dəfə uduzub. Bu say onun üçün antirekorddu.
* Superkubokda 6-cı dəfə “Real”ı məğlub edən “Barselona” tarixindəki 100-cü kuboku qazandı. "Barsa" Kataloniyada keçirilən turnirlər nəzərə alınmadan tarixində 100-cü kubok qələbəsinə imza atdı. İspaniya çempionatının 27 qat qalibi olan komanda ölkə kubokunu 31, Superkuboku 15, Eva Duarte Kubokunu 3, İspaniya Liqa Kubokunu 2 dəfə başı üzərinə qaldırıb. Bundan başqa, Kataloniya təmsilçisi Çempionlar Liqasını 5, Kuboklar Kubokunu 4, Avropa Superkubokunu 5, Yarmarkalar Kubokunu 3, klublararası dünya çempionatını 3, Latın Kubokunu 2 dəfə qazanıb. "Barselona"nın Kataloniya regional turnirlərində 33 qələbəsi var.
