“Liverpul”un misirili ulduz hücumçusu Məhəmməd Salah gözlənilməz açıqlaması ilə futbol ictimaiyyətinin diqqətini çəkib.
Arena.az məlumat verir ki, Salah, özü və bir neçə təcrübəli oyunçunun “qırmızılar”ın düşərgəsini tərk edəcəyi məqama qədər, “Liverpul”un daha bir neçə qənimət qazanmasını istəyini bəyan edib.
Vurğulanır ki, Salahın, səmimi istəyi mənzəsərində özünün və adlarını sadaladıqları oyunçuların “Liverpul”u tərk edə biləcəyinə ciddi eyham vurması, “qırmızılar”ın azarkeşləri arasında birmənalı qarşılanmayıb.
“Hamımız ayrılmazdan əvvəl daha bir qənimət qazanmalıyıq”
“Bu il mənim ilham mənbəyim qənimətlərin fəthi və xüsusilə İngiltərə Premyer Liqasında qalibiyyətdə mühüm rol oynamaq imkanıdır.
Komandada Vircil (Van Deyk), Trent (Aleksander-Arnold), Alison (Beker), Co (Qomes) və “Robbo” (Endryu Robertson), yəni beş və ya altı oyunçu qalıb. Buna görə də mən düşünürəm ki, hamımız ayrılmazdan əvvəl daha bir qənimət qazanmalıyıq. Demək olar ki, hər şeyi qazana bilmişik, ancaq Premyer Liqada yalnız bir dəfə qalib olmuşuq. Mən ümidvaram ki, bunu ikinci dəfə də edə bilərik. Bu, əla olardı”, deyə Salah vurğulayıb.
Əlavə edək ki, hazırda, Salah İngiltərə Premyer Liqasının cari mövsümünün həm ən sərrast qolçusu (19 qol) və həm də məhsuldar ötürmələr (13 məhsuldar ötürmə) üzrə ən səmərəli oyunçusudur. Salah qol və məhsuldar ötürmələrin cəmi üzrə də 32 səmərəli fəaliyyət göstərib ki, bu da cari mövsümdə İngiltərə Premyer Liqasının ən yaxşı nəticəsidir.
Məhəmməd Salah 2017-ci ilin iyul ayından “Liverpul”da çıxış edir. İngiltərə nəhəngi həmin vaxt Salahın “Roma”dan transferi müqabilində 42 milyon avro məbləğində xərc çəkib.
Salahın “Liverpul”la cari müqaviləsinin müddəti 2025-ci ilin iyun ayının sonuna qədər nəzərdə tutulub.
Salah cari mövsümdə “qırmızılar”ın heyətində bütün yarışlarda 32 oyuna çıxıb, 23 qol vurub, 17 məhsuldar ötürmə verib.
Misirli hücumçunun “Liverpul”un heyətində çıxışının ümumi mənzərəsi 381 oyun, 234 qol, 105 məhsuldar ötürmədən ibarətdir.
Salah “Liverpul”la bütün mümkün ali klub yarışlarının qalibi olub.
Misirli ulduz həmçinin “Fiorentina”, “Çelsi”, “Bazel” və “Əl-Mukavilun” klublarında çıxış edib.
Salah hazırda kapitanı olduğu, 2011-ci ilin sentyabr ayında debüt etdiyi Misir yığmasının heyətində 101 oyun keçirib. O, bu oyunlarda 58 qol vurub, 33 məhsuldar ötürmə verib.
“Transfermarkt” internet-portalı 32 yaşlı misirli hücumçunun transfer dəyərini 55 milyon avro məbləğində qiymətləndirir.
