...Ukrayna ədalətli sülh gətirməsə belə, təcili atəşkəsə ehtiyac duyur. Bu, dövləti, iqtisadiyyatı və xalqın özünü xilas etmək şansıdır, çünki indiki şəraitdə Rusiyanı hərbi yolla məğlub etmək mümkünsüz görünür.
SİA-nın məlumatına görə, bu barədə ukraynalı jurnalist və prezident Vladimir Zelenskinin keçmiş mətbuat katibi Yuliya Mendel Time üçün məqaləsində yazır....Vətəndaşlarımla söhbətlərdə bir ayıq həqiqət üzə çıxır: bu müharibə bizi kökdən çıxarır. Bir sorğu göstərdi ki, ukraynalıların 38 faizi sülh müqabilində ərazi güzəştlərinə getməyə hazırdır. Amma bu, mənə gözlənilməz mühafizəkar fiqur kimi görünür.
Bunu yazan Mendel, Ukraynanın müxtəlif yerlərindən olan tanışlarının hekayələrini bölüşür. Bu insanlar səbirsizliklə sülhü gözləyirlər. Elələri də var ki, sadəcə olaraq hər şeydən əl çəkib, Avropada daha yaxşı həyat axtarmağa gedirlər.
...Ölkəmin fövqəladə dayanıqlığına baxmayaraq, biz təkcə hərbi güclə qalib gələ bilməyəcəyimiz bir düşmənlə üz-üzəyik. Təkcə hərbi yolla qələbə ruhlandırıcı olsa da, artıq əldə edilə bilməz. Biz soruşmalıyıq ki, davamlı mübarizəmiz nəyin bahasına aparılır?.
Bunu deyən jurnalist xanım, qeyd edir ki, genişmiqyaslı müharibə zamanı Ukraynanı 7,5 milyona yaxın vətəndaş tərk edib. Üstəlik, bu tendensiya daha da sürətlənir: ötən il 440 mindən çox insan ölkəni tərk edib ki, bu da 2023-cü illə müqayisədə 3,3 dəfə çoxdur.
Mendel iqtisadi tənəzzüllə yanaşı, Ukrayna ordusunun ağır itkilərinə və rusların əli ilə mülki əhalinin həlak olmasına da diqqət çəkir. O qeyd edir ki, bu gün “Ukraynanın üçdə biri” Rusiyanın davamlı atəşi nəticəsində “cəhənnəmə” çevrilib.
Bununla yanaşı rus qoşunları Dnepropetrovsk vilayətinin sərhədlərinə yaxınlaşaraq Donbassda yavaş, lakin “amansız irəliləyiş”ini davam etdirir.
...Ədalət və tez sülhün mümkün olub-olmaması ilə bağlı sonsuz mübahisələr apararkən, ruslar daha çox torpaq zəbt edir və daha çox can alır. Müharibə davam etdikcə, bəziləri üçün vətənpərvərlik tərəddüd etməyə başlayır və tək, ümidsiz bir arzu ilə əvəz olunur: sağ qalmaq...
Bunu da Mendel yazır və təklif edir ki, ukraynalıların ədalət istəyini təmin etməyəcək “qeyri-kamil” atəşkəs sağ qalmaq üçün “lazımi addım”dır.
O, etiraf edir ki, Rusiya öz gücünü bərpa etmək və yenidən zərbə endirmək üçün atəşkəsdən istifadə edə bilər.
...Jurnalist vurğulayır ki, bu, “təslim olmağa çağırış deyil, həm gücümüzü, həm də məhdudiyyətlərimizi tanıyan strategiyadır”.
...Ukrayna sonsuz müharibədən kənar bir gələcəyə layiqdir. Bu gün sadəlövhlük möhlət axtarmaqda deyil, TikTok və Twitter-də ideallaşdırılmış sonsuz köhnəlmə müharibəsinin hansısa yolla qələbəyə gətirib çıxara biləcəyinə inanmaqdadır.
Mendel belə hesab edir.
Əli Babayev
