Futbol üzrə Braziliya yığma komandasının baş məşqçisi Dorival Junior uğursuz nəticələrlə əlaqədar istefaya göndərilib.
Arena.az xəbər verir ki, bu barədə Braziliya Futbol Konfederasiyasının (CBF) rəsmi saytı məlumat yayıb.
CBF 62 yaşlı mütəxəssisin artıq milliyə rəhbərlik etmədiyini yazıb. Qurum DÇ-2026-nın seçmə mərhələsində Argentinaya 1:4 hesablı məğlubiyyətdən sonra belə qərar qəbul edib. Artıq yeni baş məşqçi axtarışlarına start verildiyi də diqqətə çatdırılıb.
Qeyd edək ki, Braziliya millisinin baş məşqçisi vəzifəsinə əsas namizəd kimi Karlo Ançelotti və Jorje Jezuş kimi mütəxəssislərin adları çəkilir.
Ötən ilin yanvarından “sambaçılar”a başçılıq edən Dorival Junior bu komandanı 16 oyunda meydana çıxarıb. Bu görüşlərdə Braziliya millisi 7 qələbə qazanıb, 6 dəfə heç-heçə edib, 3 dəfə uduzub. “Pentakampeonlar” ötən il Amerika kubokunun 1/4 finalında mübarizəni dayandırıblar. Bir neçə gün öncə isə “selesao” 2026-cı il dünya çempionatının CONMEBOL bölgəsi seçmə mərhələsinin 14-cü turu çərçivəsində səfərdə əzəli rəqibi Argentina yığmasına 1:4 hesabı ilə məğlub olub. 14 turdan sonra Braziliya yığması DÇ-2026-nın CONMEBOL bölgəsi seçmə mərhələsinin yarış cədvəlində 21 xalla 4-cü pillədə qərarlaşıb.
