İnsan Alverinə Qarşı Mübarizə üzrə QHT Koalisiyasının və "Təmiz Dünya" Qadınlara Yardım İctimai Birliyinin sədri Mehriban Zeynalova QHT.az-a verdiyi açıqlamasında insan alveri ilə mübarizənin çağdaş dövrün tələblərinə uyğun olaraq daha da inkişaf etdirilməsi lazım olduğunu vurğulayıb. Zeynalova, alverçilərin, xüsusən də rəqəmsal aləmdə istifadəyə verdikləri imkanlardan necə faydalandığını, həmçinin bu cinayətə qarşı mübarizənin çətinləşdiyini qeyd edib.
Zeynalova, insan alverçilərinin taktikalarının dəyişdiyini və daha az xərc ilə insanları istismar etdiklərini bildirib: "Vaxtilə, məsələn, təyyarə biletləri çox baha deyildi və alverçilər yaxın ərazilərə, daha ucuz olan yerlərə daşımalar edirdilər. Amma indi internetin sürətlə həyatımıza daxil olması ilə insan alveri cinayətləri daha geniş şəkildə yayılıb. Alverçilər, təsir etmədən və çox böyük xərclər çəkmədən internet vasitəsilə insanları öz maraqlarına uyğun təkliflərlə aldadırlar. Bəzi hallarda onları sevgi asılılığına salır və şəxs özünü xoşbəxt bir aləmə qədəm qoymuş kimi hiss edir."
Bundan əlavə, Mehriban Zeynalova, insan alverinə qarşı mübarizənin çətinləşdiyini, çünki alverçilərin açdıqları milyonlarla saytlarda izləri tapmağın çox çətin olduğunu vurğulayıb. "Bu sahədə fəaliyyət göstərən QHT-lər, xüsusi açar sözlər vasitəsilə bu cinayətin izlərini tapmağa çalışır, lakin bəzən bu, çox mürəkkəb olur. İnsan alverçiləri bir saytı bağlayıb, başqa bir ölkədə yeni saytlar açaraq izləri itirirlər."
Mehriban Zeynalova, belə halların qarşısını almaq və mübarizəni daha da gücləndirmək üçün daha çox hazırlıq və bilik artırmağın vacib olduğunu qeyd edib. "Biz bu sahədə daha ciddi şəkildə hazırlıqlı olmalıyıq. Rəqəmsal imkanları insan alverçilərinə qarşı istifadə etməli və bu mübarizədə daha güclü olmalıyıq. Hal-hazırda bu sahədə bizim bacarıqlarımızın formalaşması hələ də tam olaraq başa çatmayıb," – deyə o əlavə edib.
Mehriban Zeynalova, bu mübarizənin yalnız dövlət və təşkilatların deyil, həm də bütün cəmiyyətin birgə əməkdaşlığını tələb etdiyini vurğulayıb.
Bu yazı QHT.az platforması və İnsan Alverinə Qarşı Mübarizə Üzrə QHT Koalisiyasının birgə əməkdaşlığı ilə “Ölkələrdə Milli Səviyyədə İnsan Alveri Probleminin Qarşısının Alınması Aylığı” çərçivəsində hazırlanıb.
Pərvanə Fərhadqızı
