“Real”ın fransalı ulduz hücumçusu Kilian Mbappe futbolda istirahətindən narazı olduğunu bildirib və müvafiq müqayisə təqdim edib.
Arena.az “RMC Sport” dərgisinə istinadən məlumat verir ki, fransalı ulduz, futbolçulara təqdim edilən istirahət vaxtını Milli Basketbol Assosiasiyasının (NBA) oyunçularının tətil müddəti ilə müqayisə edib:
“Siz bizim oynamağımızı istəyirsiniz, biz isə bunu edəcəyik. Amma bizim bərpa üçün vaxtımız yoxdur. Mən həmişə oynamaq istəyirəm. Bizə bərpa üçün vaxt verin. Məsələn, NBA tətil üçün dörd ay vaxt verir. Biz isə öz növbəmizdə iki həftə istirahət edirik. Bu müddətin sonunda isə hərtərəfli tibbi müayinədən keçməlisiniz. İkinci həftədə isə yenidən qaçmağa başlayırsan, bu, tətil deyil.
“Düzdür, biz çoxlu pul qazanırıq”
Ən çox maaş alan idmançıların siyahısını görəndə başqa idman növlərinin nümayəndələrini görürəm. Düzdür, biz çoxlu pul qazanırıq. Mən demirəm ki, oynamaq istəmirik, amma gəlin, dincəlməyə də vaxt tapaq. İstirahət etməyi xoşlayıram, çünki vaxtım qiymətlidir. Mənim şəklimi min dəfə çəkə bilərsiniz, tüpürmək istərəm, eynimə də deyil.
Avropa çempionatında huşumu itirdim və yoruldum. Qalmaq istədim, çünki Fransa millisində oynayanda bütün varlığını verirsən. Amma bu, yorucu idi. Dərhal tətilə getdim, gözləmədim belə. Artıq vaxt yaxınlaşırdı, çünki “Real”da təqdimatım vardı, ondan sonra isə məzuniyyətə yollandım”, deyə Mbappe bildirib.
Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib.
2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-yə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Mbappe PSJ tarixinin ən sərrast futbolçusudur.
Mbappe 2024-cü ilin iyul ayında PSJ-dən azad agent qismində ayrılaraq “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində 21 oyuna çıxıb, 11 qol vurub, 2 məhsuldar ötürmə verib.
Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 86 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
Klub səviyyəsində Mbappe PSJ ilə 6 dəfə və “Monako” ilə 1 dəfə Fransa Liqa 1-in, 4 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin dəfələrlə müxtəlif fərdi mükafatlara layiq görülüb. “Real”la isə Mbappe UEFA Super Kubokunun (2024) qalibi olub.
“Transfermarkt” internet-portalı 25 yaşlı fransalı hücumçunun transfer dəyərini 180 milyon avro məbləğində qiymətləndirir.
