Çempionlar Liqasının 6-cı turunda “Atalanta”ya qarşı səfər oyunu “Real”ın fransalı ulduz hücumçusu Kilian Mbappe üçün düşərli olmayıb.
Arena.az məlumat verir ki, Mbappe “qaymaqlılar”ın 3:2 hesablı qələbəsinə vurduğu qolla töhfəsini versə də, zədələnərək, 36-cı dəqiqədə braziliyalı hücumçu Rodriqo ilə əvəzlənib.
“TyC Sports” dərgisinin məlumatına görə, Mbappe bu gün, dekabrın 11-də tibbi müayinədən keçməlidir. Fransalı hücumçunun zədəsinin xüsusiyyəti hələ müəyyən edilməyib.
Vurğulanır ki, fransalı futbolçunun əzələlərində cüzi rahatsızlıq olsa belə, Mbappe “Rayo Valyekano” ilə İspanya La Liqasının növbəti oyununda (14 Dekabr) oynamayacaq və həmçinin 2024-cü il Qitələrarası Kubokun final oyununu (18 Dekabr) buraxmalı olacaq. Daha ciddi zədə aldığı məlum olacağı təqdirdə isə Mbappe “Sevilya” ilə dekabrın 22-də keçiriləcək İspaniya La Liqasının 2024-cü ildə son oyununu buraxacaq.
Mbappe öz zədəsi ilə bağlı açıqlama da verib: “Zədəm ciddidirmi? Heç bir anlayışım yoxdur, amma ümidvarıq ki, heç bir fəsad yoxdur.
İndi işlər olduğu kimi gedir. Bu, “Real”dır. Mən kömək və ya başqa bir xüsusla töhfə vermək üçün buradayam. Bu gün hamımız çox yaxşı idik”, – “Marca” nəşri fransalı ulduzdan sitat gətirir.
“Zədə ciddi görünmür”
“Real”ın baş məşqçisi, italyan mütəxəssis Karlo Ançelotti də Kilian Mbappenin zədəsi ilə bağlı danışıb:
“Mbappenin səhhətindəki fəsadlar həddindən artıq yüklənmə və budun arxa səthindəki narahatlıqdan qaynaqlanır. Zədə ciddi görünmür, sabah görəcəyik. O, qaça bilmirdi, bu, onu azacıq narahat etdi və biz onu əvəz etməyə üstünlük verdik”, – “Marca” nəşri Ançelottidən sitat gətirir.
Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib.
2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-yə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Mbappe PSJ tarixinin ən sərrast futbolçusudur.
Mbappe 2024-cü ilin iyul ayında PSJ-dən azad agent qismində ayrılaraq “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində 22 oyuna çıxıb, 12 qol vurub, 2 məhsuldar ötürmə verib.
Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 86 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
Klub səviyyəsində Mbappe PSJ ilə 6 dəfə və “Monako” ilə 1 dəfə Fransa Liqa 1-in, 4 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin dəfələrlə müxtəlif fərdi mükafatlara layiq görülüb. “Real”la isə Mbappe UEFA Super Kubokunun (2024) qalibi olub.
“Transfermarkt” internet-portalı 25 yaşlı fransalı hücumçunun transfer dəyərini 180 milyon avro məbləğində qiymətləndirir.
