UEFA PSJ-nin “Real”ın fransalı ulduz hücumçusu Kilian Mbappeyə olan borcu ilə bağlı işə baxmağı planlaşdırmır.
Arena.az “Ekip” nəşrinə istinadən məlumat verir ki, qurumun müvafiq mövqeyi bu məsələ ilə bağlı müvafiq sənədləri hələ də almamasıdır.
Xatırladaq ki, daha əvvəl Fransa nəhənginin “Klubların lisenziyalaşdırılması və maliyyə sabitliyi haqqında” əsasnaməsinin mümkün pozuntusu ilə əlaqədar, UEFA-nın sanksiyalarına məruz qala biləcəyi haqda məlumat yayılıb. Buna əsasən, avrokubok yarışlarında iştirak edən klubların iyunun 30-dan, sentyabrın 30-dan və dekabrın 31-dən gec olmayaraq ödəniləcək ödənişlər üzrə, müvafiq olaraq iyulun 15-i, oktyabrın 15-i və yanvarın 15-i tarixlərinə qədər işçilər qarşısında borcları olmamalıdır. Beləliklə, bu ayın 15-nə qədər PSJ klubun müvafiq borcunun olmadığını göstərən məlumatları təqdim etməyə mükəlləfdir.
Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb. Kilian böyük futbolda məhz “Monako” ilə debüt edib.
2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-yə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Mbappe PSJ tarixinin ən sərrast futbolçusudur.
Mbappe 2024-cü ilin iyul ayında PSJ-dən azad agent qismində ayrılaraq “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində 27 oyuna çıxıb, 14 qol vurub, 3 məhsuldar ötürmə verib.
Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 86 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
Klub səviyyəsində Mbappe PSJ ilə 6 dəfə və “Monako” ilə 1 dəfə Fransa Liqa 1-in, 4 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin dəfələrlə müxtəlif fərdi mükafatlara layiq görülüb. “Real”la isə Mbappe UEFA Super Kubokunun (2024) və FIFA Qitələrarası Kubokun (2024) qalibi olub.
