İngiltərə Premyer Liqasının 23-cü turunun “İpsviç Taun”la ev oyunu “Liverpul”un futbolçusu Məhəmməd Salah üçün əlamətdar olub.
Arena.az xəbər verir ki, misirli hücumçu 4:1 hesablı qələbəyə sevindikləri bu qarşılaşmanın 35-ci dəqiqəsində qol müəllifi olub.
Bu, 32 yaşlı futbolçunun Premyer Liqada 176-cı qolu olub. Salah bununla da “Arsenal”ın sabiq hücumçusu Tyerri Anrini (175) geridə qoymağı bacarıb və ən çox qol vuranların siyahısında yeddinci pilləyə yüksəlib.
Xatırladaq ki, İngiltərə Premyer Liqasında ən çox qol vuran futbolçuların siyahısına “Nyukasl”ın sabiq hücumçusu Alan Şirer (260) başçılıq edir. Hazırda “Bayern”in formasını geyinən Harri Keyn (213) ikincidir. İlk “üçlüy”ü “Mançester Yunayted”in keçmiş hücumçusu Ueyn Runi (208) qapayır.
Salah İngiltərə Premyer Liqasının cari mövsümünün həm ən sərrast qolçusu (19 qol) və həm də məhsuldar ötürmələr (13 məhsuldar ötürmə) üzrə ən səmərəli oyunçusudur. Salah qol və məhsuldar ötürmələrin cəmi üzrə də 32 səmərəli fəaliyyət göstərib ki, bu da cari mövsümdə İngiltərə Premyer Liqasının ən yaxşı nəticəsidir.
Məhəmməd Salah 2017-ci ilin iyul ayından “Liverpul”da çıxış edir. İngiltərə nəhəngi həmin vaxt Salahın “Roma”dan transferi müqabilində 42 milyon avro məbləğində xərc çəkib.
Salahın “Liverpul”la cari müqaviləsinin müddəti 2025-ci ilin iyun ayının sonuna qədər nəzərdə tutulub.
Salah cari mövsümdə “qırmızılar”ın heyətində bütün yarışlarda 32 oyuna çıxıb, 23 qol vurub, 17 məhsuldar ötürmə verib.
Misirli hücumçunun “Liverpul”un heyətində çıxışının ümumi mənzərəsi 381 oyun, 234 qol, 105 məhsuldar ötürmədən ibarətdir.
Salah “Liverpul”la bütün mümkün ali klub yarışlarının qalibi olub.
Misirli ulduz həmçinin “Fiorentina”, “Çelsi”, “Bazel” və “Əl-Mukavilun” klublarında çıxış edib.
Salah hazırda kapitanı olduğu, 2011-ci ilin sentyabr ayında debüt etdiyi Misir yığmasının heyətində 101 oyun keçirib. O, bu oyunlarda 58 qol vurub, 33 məhsuldar ötürmə verib.
“Transfermarkt” internet-portalı 32 yaşlı misirli hücumçunun transfer dəyərini 55 milyon avro məbləğində qiymətləndirir.
